Deputeti i Partisë Liberale Egjiptiane, Veton Berisha qëndroi me deputetët e PDK-së, LDK-së e AAK-së në sallën e Kuvendit dhe pas ndërprerjes së seancës konstituive për herë të 50-të, doli në foltore për që t’i drejtohet komunitetit egjiptian në vend.
Ai tha se dëmi nga moskonstituimi i Kuvendit është “i madh”, ndërsa shtoi se do ta votonte cilido kandidat për kryetar të Kuvendit, por “në formën e hapur”.
“Unë e kam deklaruar votën time. Kam përgjegjësi për atë që them dhe i qëndroj mbrapa gjithë asaj. Jam i gatshëm ta votojë secilin kandidat për kryetar të Kuvendit, por në formën e hapur. Nuk pranoj veprime antikushtetuese”, tha Berisha.
Deputeti kërkoi që Gjykata Kushtetuese “ta përshpejtojë procesin dhe ta qartësojë situatën tonë politike”.
Ai u kërkoi falje egjiptianëve, të cilëve tha se u ka dhënë shumë premtime.
“Kam premtuar shumë. Kam thënë që do të fillojë ndryshimin që në ditën e parë, por kjo nuk më mundësohet. Nuk më jepet mundësia sepse këtu dikush ka vendosur që ta çojë procesin në bllokadë në pafundsi”, tha Berisha.
